SA pagdiriwang ng Araw ng mga Puso, ibinahagi ni Pangulong Ferdinand Marcos Jr. ang kanyang mga personal na pagninilay tungkol sa pag-ibig at pag-aasawa, at pinayuhan ang mga magkasintahan na ang pangmatagalang relasyon ay nakabatay sa “bigayan” o pag-uunawaan. Binigyang-diin din niya na ang tunay na pagkakaibigan ang pundasyon ng isang matibay na pagsasama.
Sa kanyang BBM Vlog episode 277, pinayuhan ni Pangulong Marcos ang mga magkapareha na “i-enjoy ang isa’t isa. Alam ninyo, bihira kang makatagpo ng isang tao na mahalaga sa iyo at nagmamalasakit din sa iyo, na masaya kayong magkasama. Bumabalik tayo sa konsepto ng pagkakaibigan. Iyan ang dapat ninyong hanapin. At kapag natagpuan ninyo iyon at Araw ng mga Puso, sulitin ninyo. Napakagandang pakiramdam niyan.”
Sinagot din ng Pangulo ang mga tanong mula sa mga grupo ng kabataan tungkol sa pag-ibig, pag-aasawa, at buhay-pamilya, batay sa mahigit tatlong dekada niyang pagsasama sa Unang Ginang na si Louise Araneta-Marcos.
Binigyang-diin ni Pangulong Marcos na mahalagang maglaan ng oras para sa isa’t isa sa kabila ng abalang iskedyul, alagaan ang pagkakaibigan, at magsagawa ng maliliit ngunit makabuluhang mga bagay upang mapanatili ang matibay at malusog na relasyon.
“Palagay ko alam na ito ng matagal nang mag-asawa—ang sikreto lang diyan, hindi naman talaga sikreto, ay dapat bigayan. Hindi naman pare-pareho ang lahat ng tao. Dapat nagbibigayan lang at nagkakaunawaan ang mag-asawa. Hindi puwedeng ‘my way or no way,’ dahil kapag ganoon, may isang laging malungkot. Kaya bigayan lang,” payo ng Pangulo sa kabataan.
Kinilala rin ng Pangulo ang masayang kapaligiran sa buong bansa, kabilang ang mga siksikang mall at restoran na puno ng mga magkasintahang nagde-date. Binanggit din niya ang pagiging abala ng mga nagtitinda ng bulaklak at regalo, at sa kabila ng mabigat na trapiko, ipinahayag ang pag-asang nasisiyahan ang lahat sa araw na ito, na dapat manaig ang pag-ibig at mabuting kalooban.
Tungkol naman sa kung paano nababalanse ng unang pamilya ang trabaho at oras para sa isa’t isa, inamin ng Pangulo na halos lahat sa kanilang pamilya ay may mabibigat na responsibilidad, kaya mahirap makahanap ng kahit isang araw upang magsama-sama.
“Isa na ito sa pinakamahirap gawin dahil halos lahat sa pamilya ko ay napakaabala. Abala ako. Abala ang First Lady. Ang mga anak ko ay abala rin. Kung minsan mahirap makabuo ng kahit sandali—kahit isang araw lang o makapag-dinner man lang. Basta’t may pagkakataon na magsama-sama, sinusulit namin iyon. Hindi namin ito palaging napaplano. Minsan biglaan na lang—‘Uy, libre tayong lahat, magkita tayo.’ May gagawin kami nang magkakasama,” ani Pangulong Marcos.
Ipinaliwanag ng Pangulo na kadalasan ay biglaan ang kanilang mga pagtitipon bilang pamilya—minsan ay long weekend trip sa Ilocos o sa ibang lugar—upang makapaglaan ng de-kalidad na oras bilang isang pamilya na may limang miyembro, sa kabila ng iba pang obligasyon. Inamin niyang hindi ito palaging madali, ngunit sinisikap nilang unahin ang pagsasama-sama.
Nang tanungin kung anong love song ang kumakatawan sa kanilang relasyon, sinabi ng Pangulo na bagama’t walang awiting eksaktong sumasalamin sa kanilang kuwento, espesyal para sa kanila ang “Moonlight in Vermont” na inawit ni Sarah Vaughan, dahil ito ang tugtog sa isa sa kanilang mga unang date sa New York.
Tungkol naman sa kasalukuyang uso kung saan ibinabahagi ng mga kabataan kung paano nila isinapanganib ang pagkakaibigan sa pag-amin ng damdamin gamit ang kantang “Ruin the Friendship” ni Taylor Swift, sinabi ng Pangulo na hindi siya naniniwalang nasisira ang pagkakaibigan dahil dito. Ipinaliwanag niyang bagama’t inilalarawan ng kanta ang paglipat mula sa pagiging magkaibigan tungo sa pagiging magkasintahan, ang pundasyon pa rin ng anumang matatag na relasyon ay tunay na pagkakaibigan.
“Hindi ko iniisip na nasisira ang pagkakaibigan. Naiintindihan ko ang gustong sabihin ni Taylor Swift—na lumalabas kayo sa ‘friend zone’ at nagiging magkasintahan. Pero para sa akin, ang batayan ng anumang magandang relasyon ay tunay na pagkakaibigan. Ang pinakamagagandang relasyon na nakita ko ay nagsimula sa pagiging magkaibigan,” ani Pangulo.
“‘Yung sinasabi nilang nade-develop iyan. Pero kung hindi kayo magkaibigan—kung hindi kayo masaya at hindi ninyo nae-enjoy ang isa’t isa, kung hindi ninyo napapasaya ang isa’t isa—kung hindi nangyayari ‘yung gaya ng linya sa sine na ‘you complete me,’ mahirap talagang magtagal ang pagsasama. Kaya sa tingin ko, dapat nakabatay ito sa tunay at wagas na pagkakaibigan,” dagdag niya.
The post Valentine payo ni PBBM: Magbigayan, hindi pwedeng my way, or no way appeared first on Journal News Online.
