AYON sa mga ulat, binale-wala ni Senate President Pro Tempore Panfilo “Ping” M. Lacson ang mga paratang na siya ang nag-splice ng video clip na sinasabing ginamit upang mailarawan sa maling paraan ang pahayag ni Senator Rodante D. Marcoleta hinggil sa Kalayaan Island Group.
Sinabi rin ni Lacson na may nakaabot sa kanya umanong balita na may kapwa senador na nagbabantang magsampa ng ethics complaint laban sa kanya dahil sa umano’y pag-splice.
Gayunman, sinabi ni Lacson na “zero knowledge of how a video is being spliced,” at pabirong idinagdag na kailangan pa siyang turuan kung paano ito gawin.
Ayon sa mga ulat, iginiit ni Marcoleta na ang clip na in-upload sa opisyal na page ni Lacson ay na-edit umano sa paraang hindi tumugma sa aktuwal na pagkakasunod ng palitan sa Commission on Appointments hearing tungkol sa national defense.
Ayon din sa mga ulat, sinabi ni Marcoleta na nagbigay ito ng impresyon na siya ay “advocating for the giving up of the Kalayaan Island Group,” na itinanggi niya, at iginiit na ang kanyang pahayag ay bahagi ng mas malawak na talakayan sa international law, maritime zones, at mga limitasyon ng Philippine Exclusive Economic Zone.
Dagdag pa sa mga ulat, ikinonsidera ni Sen. Marcoleta ang hakbang na ito laban kay Lacson “para mailabas ang katotohanan na hindi pinutol putol.”
Sinabi rin ni Marcoleta na ang tugon ng isang armed forces officer na ipinakita sa video ay mula umano sa ibang linya ng pagtatanong, at nang pinagsama-sama ang mga bahagi ay nabuo, aniya, ang isang misleading narrative laban sa kanya. Sinabi niyang pinag-iisipan niyang magsampa ng pormal na reklamo sa Senate Ethics Committee.
Batay sa pinakahuling update sa ulat, wala pa umanong naihahaing pormal na ethics complaint si Marcoleta laban kay Sen. Lacson.
The post Lacson binale-wala ‘spliced video’ paratang ni Marcoleta appeared first on Journal News Online.
