MATAGUMPAY na nasagip ng National Bureau of Investigation–International Operation Division (NBI-IOD) ang isang Chinese national na kinidnap ng mga suspek na kapuwa niya Chinese national, at naaresto ang mga ito sa isang high-stakes entrapment operation sa Quezon City noong Miyerkules.
Nagsimula ang imbestigasyon matapos iulat ng nobyo ng biktima ang pagkawala nito. Noong Pebrero 9, 2026, nagawang makipag-ugnayan ng nagrereklamo sa biktima sa pamamagitan ng Viber, para lamang ipaalam na siya ay kinulong ng mga suspek.
Habang kinakausap nito ang kanyang nobya sa nasabing Viber call, kinuha ng isa sa mga kidnapper ang telepono at humingi ng ransom na P500,000 para sa kanyang paglaya.
Ang mga pagsisiyasat kalaunan ay nagsiwalat na pinilit na ng mga dumukot ang biktima na maglipat ng RMB104,000, o katumbas ng P832,000, sa pamamagitan ng online transfer bago pa man ginawa ang ransom demand.
Upang mapilitan ang nagrereklamo, pinayagan ng mga kidnapper ang isang video call kung saan ipinakita ng biktima ang mga pasa sa kanyang katawan.
Nagbanta pa ang mga suspek na papatayin at pagpuputol-putulin ang katawan ng biktima kung hindi magbibigay ng ransom pagsapit ng Pebrero 10. Kasunod na inilipat ang komunikasyon sa Telegram upang makaiwas sa pagtuklas.
Dahil dito, isang strategic entrapment operation ang isinagawa noong Pebrero 11 ng NBI-IOD operatives sa isang hotel sa Quezon City.
Habang nakikipag-ugnayan ang biktima sa mga suspek at ipinagpapalit ang marked ransom money, dito na agad kumilos at dinakma ng mga ahente ng NBI ang mga suspek.
Matagumpay na naaresto ang dalawang Chinese national at tinitiyak ang ligtas na pagbawi ng biktima.
Ang mga naarestong suspek ay iniharap para sa inquest proceedings para sa kidnapping at serious illegal detention, kaugnay ng Section 6 ng Republic Act No. 10175, o Cybercrime Prevention Act of 2012.
Gayunman, patuloy pa ang ginagawang follow-up operation ng mga ahente ng NBI kaugnay sa mga kasangkot pa sa kidnapping case ng Chinese national.
“Ang NBI ay magiging walang humpay sa pagtugis sa mga kriminal na target ang kapuwa Pilipino at dayuhan, na tinitiyak na ang ating bansa ay mananatiling ligtas na kanlungan para sa lahat,” pahayag ni acting NBI Director Angelito DLP Magno.
Pinuri niya ang mga ahente ng IOD para sa kanilang mabilis na pagkilos at inulit ang pangako ng NBI sa pagpapanatili ng isang ligtas na kapaligiran, kung saan ang mga dayuhang bisita at residente ay protektado at ang mga kriminal na sindikato ay walang puwang sa bansa na gumawa ng kasamaan.
The post TSINO KINIDNAP, NAILIGTAS MULA KAPWA TSINO appeared first on Journal News Online.
